• Валюта бағамы: USD 378.17 | EUR 429.11 | RUB 5.88 | CNY 56.48 |

Сарысу ауданына жаңа әкім тағайындалды

0

Бүгін Сарысу ауданына жаңа әкім тағайындалды. ҚР Президент әкімшілігінің және аудандық мәслиxаттың келісімі бойынша, Жамбыл облысы әкімінің 2019 жылғы «14» наурыздағы №39-Ж/Қ өкімімен Қанатбек Қайшыбекұлы Мәдібек Сарысу ауданының әкімі қызметін атқаратын болды.
Облыс басшысы Асқар Мырзаxметов аудан активіне жаңа әкімді таныстырып, жұмысына сәттілік тіледі. Асқар Исабекұлы Сарысу ауданының өндіріске бейім, мал шаруашылығына қолайлы екенін ескеріп, ауданның жаңа әкіміне өнеркәсіп өндірісінің жұмыстарын жүйелеуде, өңірдің экономикасы мен әлеуетін арттыру жолында мол жауапкершілік жүктеп, сенім білдірді.
Қанатбек Қайшыбекұлы артылған сенімді ақтауға тырысатынын жеткізді. Ал, бұған дейін аудан әкімі қызметін атқарған Балабек Нарбаев облыс әкімдігінің еңбек инспекциясы басқармасының басшысы болып тағайындалды.
Айта кетейік, Қанатбек Қайшыбекұлы Мәдібек 1977 жылы туылған, білімі жоғары, 1998 жылы Қазақ мемлекеттік аграрлық университетін «инженер-механик»» мамандығы бойынша бітірген. Еңбек жолын 1998 жылы Сарысу ауданы Жаңатас қаласындағы «Сумен қамтамасыз ету және канализация» мекемесінің инженері болып бастаған.
Сарысу ауданы әкімі аппаратында кеңесші, бас маман, бөлім меңгерушісі, Сарысу ауданы Жаңаарық ауылдық округінің әкімі, Жамбыл облысы әкімі аппаратының бас инспекторы, бөлім меңгерушісі, Жамбыл облысы әкімі аппараты басшысының орынбасары, Сарысу ауданының әкімі, Жамбыл облысы әкімдігінің табиғи ресурстар және табиғат пайдалануды реттеу басқармасы басшысының орынбасары қызметтерін атқарған.
2016 жылдың қазанынан бастап Қазақстан Республикасы Энергетика министрлігінің экологиялық реттеу және бақылау комитеті Жамбыл облысы бойынша экология департаментінің басшысы қызметін атқарып келді.

Пікір қалдыру